PVL quarterfinal cast kumpleto na
MANILA, Philippines — May dapat ipagpasalamat ang Farm Fresh sa PLDT.
Ito ay matapos patalsikin ng High Speed Hitters ang Choco Mucho Flying Titans, 21-25, 25-18, 25-16, 25-19, para kumpletuhin ang quarterfinal cast ng 2024 Premier Volleyball League (PVL) Reinforced Conference kahapon sa FilOil EcoOil Centre sa San Juan City.
Pumalo si Russian import Lena Samoilenka ng 30 points tampok ang 27 attacks para sa 6-2 record ng PLDT kasabay ng paghuhulog sa Choco Mucho sa 2-6.
“Siguro hindi namin best. Pero iyon nga, ang daming factors eh. Baka alam na sure na kami sa No. 4 or 5. Hindi puwede iyong ganoong laro,” ani coach Rald Ricafort sa pag-upo nila sa No. 4 spot sa quarterfinals kontra sa No. 5 Chery Tiggo. “Bawi kami sa next game against Chery Tiggo.”
Nag-ambag si Kiesha Bedonia ng 16 markers at may 13 points si Erika Santos habang naglista si setter Kim Fajardo ng 17 excellent sets.
Ang panalo ng High Speed Hitters sa Flying Titans ang nagbigay sa Foxies ng No. 8 ticket sa knockout quarterfinals katapat ang No. 1 Akari Chargers (8-0).
Naglaro ang Choco Mucho na wala sina coach Dante Alinsunurin, kasama ng Alas Pilipinas men’s team, at ang may sakit na si Greek import Zoi Faki.
Sa unang laro, inangkin ng Creamline ang No. 3 berth sa quarterfinals matapos walisin ang sibak nang ZUS Coffee, 25-17, 25-15, 25-22.
“We’re ready sa lahat ng challenges na mangyayari. Ang importante lang talaga is iyong determination namin na manalo,” ani Cool Smashers’ coach Sherwin Meneses.
Humataw si American import Erica Staunton ng 17 points habang may 11 markers si Bernadeth Pons na sumalo sa naiwang trabaho nina injured Tots Carlos at Alyssa Valdez.
Pumalo si Japanese import Asak Tamaru ng 16 points sa panig ng Thunderbelles.
- Latest
