Pangilinan nagbigay ng P10 milyon kay Yulo
![Pangilinan nagbigay ng P10 milyon kay Yulo](https://media.philstar.com/photos/2024/08/22/pangilininan_2024-08-22_23-16-28.jpg)
MANILA, Philippines — Nagbigay ang Manny V. Pangilinan Sports Foundation (MVPSF) ng P10 million bonus kay 2024 Paris Olympics double gold medalist Carlos Yulo para sa kanyang naibigay na karangalan sa Pilipinas.
Ayon kay Pangilinan, karapat-dapat ang 24-anyos na gymnast sa nasabing bonus pati na ang suporta ng kanyang foundation sa iba pang national athletes.
“Since 2016, nandoon kami with Caloy (Yulo) and also with other athletes. But at the end of the day, sila gumawa, hindi kami. Credit belongs to them,” wika ni MVP kahapon sa meet and greet kay Yulo sa PLDT building sa Makati City.
Ayon kay Yulo, gagamitin niya ang nasabing bonus ng MVPSF sa kanyang paghahanda para sa 2028 Olympics sa Los Angeles, USA.
“Nagpapasalamat po ako kay sir MVP at sa MVPSF na naniwala sa amin from the start,” sabi ng tubong Leveriza, Malate. “Sana po patuloy ninyo po kaming suportahan papuntang LA Olympics.”
Inaasahang aabot sa P100 milyon ang matatanggap na cash incentives ni Yulo kasama ang isang P32 million three-bedroom condominium unit sa McKinley Hill mula sa Megaworld.
Isang house and lot sa Tagaytay City ang bigay naman ni Philippine Olympic Committee (POC) president Abraham ‘Bambol’ Tolentino.
“I told Caloy, of course, to enjoy the moment and adulation. He deserves that, he deserves the rest,” ani Pangilinan.
Nasa okasyon din sina Samahang Basketbol ng Pilipinas (SBP) at MVPSF president Al Panlilio, Association of Boxing Alliances of the Philippines (ABAP) chairman Ricky Vargas, MVPSF executive director Jude Turcuato at Gymnastics Association of the Philippines (GAP) head Cynthia Carrion.
Binigyan din ng MVPSF ng P5 milyon si Cebuano coach Aldrin Castañeda na tumulong kay Yulo para makamit ang dalawang Olympic gold sa men’s floor exercise at vault.
Bukod kay Yulo, nagbigay din ang MVPSF, sumusuporta sa 19 pang national sports associations bukod sa gymnastics, ng tig-P2 milyon kina national boxers Nesthy Petecio at Aira Villegas na sumuntok ng tig-isang bronze sa Paris Games.
Ang reward para kina Petecio at Villegas, parehong umuwi sa kanilang mga probinsya para magpahinga, ay tinanggap nina Vargas, national coaches Reynaldo Galido at Mitchel Martinez at ABAP secretary-general Marcus Manalo.
Ang mga national boxing coaches ay may gantimpala ring P1 milyon mula kay MVP.
- Latest