Henry, Bolick inakay ang NLEX sa panalo
MANILA, Philippines — Rumatsada sa 104-87 panalo ang NLEX kontra sa Blackwater, 104-87, para sa pambihirang debut sa 2024 PBA Governors’ Cup kahapon sa Smart-Araneta Coliseum.
Nagkapit-bisig sina import Myke Henry at Robert Bolick upang buhatin sa bigating panalo ang Road Warriors matapos kumawala sa second at third quarters mula sa dikit na first quarter.
Nagliyab sa 31 puntos at 10 rebound si Henry habang humakot ng halos triple-double na 24 puntos, 11 rebounds at 9 assists si Bolick para sa malupit na 1-2 punch.
Bunsod nito, nabigyan ng NLEX ng magandang debut win si head coach Jong Uichico sa kanyang pagbabalik sa PBA matapos siyang pumalit kay Frankie Lim sa offseason.
Umalalay kina Henry at Bolick sina Robbie Herndon at Richie Rodger na may 12 at 10 puntos, ayon sa pagkakasunod habang may 8 si Anthony Semerad.
Abante lang nang bahagya ang NLEX sa unang bahagi, 23-22, bago i-outsccore ang Blackwater, 61-40, sa sumunod na dalawang quarters tungo sa 17-point win.
Sinamahan ng NLEX ang San Miguel at Rain or Shine sa tuktok ng Group B sa ilalim ng bagong format tampok ang Top 4 teams na makakapasok sa quarterfinals.
Laglag naman sa 0-2 ang Blackwater matapos unang matalo sa Rain or Shine, 110-97.
- Latest
