Gagate sa Zus Coffee; Coronel hinugot ng Galeries Tower
MANILA, Philippines — Napili sina Alas Pilipinas members Thea Gagate at Julia Coronel bilang top picks ng kauna-unahang Premier Volleyball League (PVL) Rookie Draft kahapon sa Novotel sa Cubao, Quezon City.
Hinirang ng Zus Coffee ang 6-foot-2 na si Gagate bilang No. 1 overall selection, habang si Coronel ay pinili ng Galeries Tower bilang No. 3 pick.
“Of course, I’m very grateful and honored na ako iyong first pick nila, and naa-appreciate nila iyong efforts ko as an athlete,” ani ng 23-anyos na si Gagate.
Ihahalo ni coach Jerry Yee ang three-time UAAP Best Middle Blocker kina St. Benilde stars Cloanne Mondoñedo, Gayle Pascual, Jade Gentapa at Michelle Gamit sa Thunderbelles.
Walang naipanalong laro ang Zus Coffee, dating Strong Group Athletics, sa 11 laban sa nakaraang 2024 All-Filipino Conference.
Matapos si Gagate ay pinili ng Capital1 Solar Energy si dating Lady Spikers middle blocker Leila Cruz bilang No. 2 pick.
Pinili namang No. 4 selection ng Farm Fresh si Maicah Larroza kasunod sina No. 5 Lucille Almonte (Nxled), No. 6 Stephanie Bustrillo (Akari), No. 7 Ishie Lalongisip (Cignal HD) at No. 8 Angge Alcantara (PLDT).
Ang mga nakuhang players ay dapat makakuha ng qualifying offers mula sa mga koponang pumili sa kanila sa loob ng 15 calendar days.
Dapat namang alukin ang mga first-round picks ng minimum three-year contract at ang second at mga sumunod na napili ay nararapat bigyan ng minimum one-year pact.
Isang one-conference contract naman ang dapat ibigay sa mga undrafted players na pinapirma ng kanilang mga tropa.
- Latest
