JB inihalintulad kay Jordan

MANILA, Philippines — Si Justin Brownlee ang Michael Jordan ng Pilipinas!

Ito ang idineklara ni 7-foot-3 Kai Sotto kung saan inihalintulad nito ang Gilas Pilipinas naturalized player sa NBA superstar na may maningning na karera hindi lamang sa NBA maging bilang bahagi ng US Dream Team.

Sinabi ito ni Sotto sa isang video na inilabas ng FIBA sa kanilang social media account habang nasa FIBA Olympic Qualifying Tournament ito sa Riga, Latvia.

“The world don’t really know much about Justin Brownlee, but for me, he’s the Michael Jordan of Philippine basketball, so you know, that’s what we expect him to do and that’s what he does every night,” wika ni Sotto.

Pinuri ni Sotto ang magandang attitude ni Brownlee hindi lamang sa loob ng court maging sa labas nito.

Masaya si Sotto na naging teammate nito si Brownlee sa Gilas Pilipinas dahil malaki ang naitutulong nito sa kanilang tropa.

Tunay na maaasahan si Brownlee na siyang tumulong sa Gilas Pilipinas para mabawi ang gintong medalya sa Southeast Asian Games noong nakaraang taon sa Cambodia at masikwat ang ginto sa Asian Games sa Hangzhou, China noon ding 2023.

“He just goes out there with his A-game every single night. He’s a great teammate, he’s a great player and we’re very lucky to have him,” ani Sotto.

Nagtala si Browlee ng 26 puntos, siyam na rebounds at siyam na assists sa 89-80 panalo ng Gilas kontra sa Latvia sa Olympic quaifiers.