Pinay spikers palaban sa mga Vietnamese
Kenya ‘di umubra sa Puerto Rico
MANILA, Philippines — Bagama’t nagkaroon ng konting pagbabago sa posisyon ay handa pa rin ang Alas Pilipinas na sagupain ang Vietnam sa 2024 FIVB Women’s Volleyball Challenger Cup.
Sasalang ang mga Pinay at Vietnamese spikers sa knockout quarterfinal match ngayong alas-6:30 ng gabi sa Ninoy Aquino Stadium sa Malate, Manila.
Itatampok ng Alas Pilipinas ni Brazilian coach Jorge Souza de Brito sina Creamline star Jema Galanza at collegiate standout Bella Belen habang wala naman sa lineup sina veterans Eya Laure at Jen Nierva at collegiate hitter Alyssa Solomon.
Bukod kina Galanza at Belen, ang iba pang muling hahataw para sa tropa ay sina team captain Jia De Guzman, Angel Canino, Thea Gagate, Fifi Sharma, Sisi Rondina, Faith Nisperos, Vanie Gandler, Julia Coronel, Dell Palomata, Arah Panique, Dawn Macandili-Catindig at Cherry Nunag.
Ang 5-foot-10 na si Nunag, isang natural middle blocker, ang inilagay ni De Brito bilang libero matapos ibalik si Galanza sa kanyang outside hitter position.
“You may not know the real reasons or stories behind it, but tough decisions are not made for nothing,” sabi ni De Guzman.
Nagmula ang Alas Pilipinas sa makasaysayang bronze medal finish sa nakaraang 2024 AVC Challenge Cup na pinagreynahan ng Vietnam noong Hunyo.
Samantala, pumalo sina Diana Reyes at Grace Mar Lopez ng pinagsamang 29 points para sa 25-20, 25-19, 27-25 pagsibak ng Puerto Rico sa Kenya.
Sa pag-entra sa knockout semifinals ay lalabanan ng Puerto Rico ang mananalo sa Belgium at Sweden kagabi.
Pinamunuan ni Pamella Owino ang Kenya sa kanyang 22 points mula sa 21 attacks at isang block.
- Latest
