Panganiban, Ramos idinagdag sa Gilas Women

MANILA, Philippines — Pinalakas ng Gilas Pilipinas Women’s team ang kanilang kampanya sa 2024 William Jones Cup sa pagdadagdag kina Naomi Panganiban at Gabby Ramos.

Ang Jones Cup na nakatakdang magbukas sa Sabado sa New Taipei, Taiwan ang magsisilbing pagsubok para sa dalawang US-based players na babandera sa Gilas Pilipinas U18 team sa Division A kasama ang Australia, China at Japan.

Kamakailan ay pinag-reynahan ng Gilas Girls, kasama sina Panganiban at Ramos, ang 2024 FIBA U18 Women’s Asia Cup Division B tournament sa Shenzhen, China para sa promosyon sa Division A.

“We’ve been training already since before pa. May darating na mga Fil-Ams today, sila Kristan Yumul, Kate Bobadilla. We’re trying to build young ones na parang i-ready natin sa Division A,” ani Gilas Pilipinas Women head coach Pat Aquino kahapon sa lingguhang PSA Forum sa Philippine Sports Commission conference hall.

Nagtala si Panganiban, isang San Diego State University newcomer, ng 11.8 points per game para sa Gilas U18, habang may 11.3 rebounds average ang University of Nevada player na si Ramos.

Ang pagdagdag kina Panganiban at Ramos ang makakatulong din sa pagpangalan sa final roster ng Gilas Women sa FIBA Women’s World Cup Pre-Qualifying Tournament sa Rwanda sa Agosto.

“It’s trial for the two youngsters, and mga former youth program and iyong mga senior, they have to compete with each other to be in the final roster for Rwanda,” dagdag ni Aquino sa sesyon na inihandog ng San Miguel Corporation, Philippine Sports Commission, Philippine Olympic Committee, MILO, Smart/PLDT at 24/7 sports app na ArenaPLus.