Yulo, Sanchez mag-eensayo na sa Metz training camp
MANILA, Philippines — Isa-isa nang nagdadatingan ang iba pang Olympic-bound athletes sa Metz training camp sa France para paghandaan ang 2024 Paris Games.
Lumapag na kahapon ng umaga si two-time world gymnastics champion Caloy Yulo para sa kanyang preparasyon sa quadrennial event na nakatakda sa Hulyo 26 hanggang Agosto 11.
Sa kanyang unang kampanya sa Olympics sa 2020 Tokyo Games ay tumapos si Yulo sa fourth place sa men’s vault.
“Ibibigay ko po lahat ng kaya kong gawin and iyong best ko. Bonus na lang po kung maka-gold medal ako,” wika ng 24-anyos na batang Tondo sa kanyang ikalawang Olympics stint.
Bukod kay Yulo, sasalang din sa Olympic gymnastics sina Aleah Finnegan, Levi Ruivivar at Emma Malabuyo para palakasin ang tsansa ng bansa sa gold medal.
Kamakalawa ay dumating na din sa Metz si two-time Olympic swimming medalist Kayla Sanchez.
Nauna na sa Metz training camp sina Tokyo Olympics silver medalists Nesthy Petecio at Carlo Paalam, Hergie Bacyadan at Aira Villegas ng boxing, weightlifters Elreen Ando, John Ceniza at Vanessa Sarno at rower Joanie Delgaco.
Inaasahang darating ngayong linggo sina Finnegan, Ruivivar, Malabuyo, Tokyo Olympics bronze medalist Eumir Felix Marcial ng boxing, pole vaulter EJ Obiena, fencer Sam Catantan, swimmer Jarrod Hatch, judoka Kiyomi Watanabe at golfers Bianca Pagdanganan at Dottie Ardina.
Hangad nilang maduplika ang binuhat ni weightlifter Hidilyn Diaz na kauna-unahang Olympic gold ng bansa sa Tokyo Games.
- Latest
