Perez hinugot ng HD Spikers
MANILA, Philippines — Ang beteranong si MJ Perez ang kinuhang import ng Cignal HD para sa 2024 Premier Volleyball League (PVL) Reinforced Conference na nakatakda sa Hulyo 16.
Muling makakasama ng 36-anyos na Venezuelan wing spiker sa HD Spikers si libero Dawn Macandili-Catindig na dati niyang teammate sa F2 Logistics Cargo Movers sa Philippine Super Liga noong 2017 hanggang 2019.
“Here for an awesome comeback! Get ready for a major upgrade as former Olympian MJ Perez returns to suit up for Team Awesome in the 2024 PVL Reinforced Conference,” pahayag ng Cignal sa kanilang social media post.
Tinulungan ng 6-foot-2 na si Perez ang Cargo Movers na makopo ang PSL crown sa 2017 Grand Prix kung saan siya hinirang na Most Valuable Player.
Matapos sa Pilipinas ay naglaro si Perez sa mga professional leagues sa Italy, Egypt, Cyprus at Vietnam at ang huli ay sa Egypt para sa Alexandria Sporting Club VC.
Sumabak din si Perez sa mga liga sa Venezuela, Puerto Rico, Finland, Cyprus, France at Indonesia.
Ang 18-year mainstay ng Venezuelan national team ang aasahan ng Cignal sa kanilang kampanya matapos tumapos sa pang-anim sa nakaraang PVL All-Filipino Conference.
Noong 2022 PVL Reinforced Conference ay sumegunda ang HD Spikers kasama si American hitter Tai Bierria bilang import.
Bukod sa Olympian na si Perez, ang iba pang imports na hahataw sa PVL Reinforced Conference ay sina Erica Staunton (Creamline), Zoi Faki (Choco Mucho), Khat Bell (Chery Tiggo), Elena Samoilenko (PLDT Home Fibr) at Marina Tushova (Capital1 Solar Energy).
Samantala, ipaparada ng Zus Coffee si Japanese import Asaka Tamaru.
“When I complimented her that she was strong, she said that she was still at 50-percent,” ani Thunderbelles’ coach Jerry Yee kay Tamaru. “Okay kami with her and the new girls, along with the new chance to be here.”
- Latest
