Vietnam kinumpleto ang sweep sa Pool B
MANILA, Philippines — Kinumpleto ng Vietnam ang four-game sweep para pangunahan ang Pool B sa preliminary round ng 2024 Asian Volleyball Confederation (AVC) Challenge Cup for Women kahapon sa Rizal Memorial Coliseum sa Manila.
Pinabagsak ng defending champions ang Indonesia, 25-17, 25-15, 25-27, 25-13, sa likod ng 23 attacks ni outside hitter Vi Thi Nhu Quynh habang may 10 markers si Tran Tu Linh para sa kanilang 4-0 record.
“The coaching staff used a different rotation today. It is to ensure everyone is involved and ensure everyone is ready to go when the time comes,” sabi ni Quynh sa pagmartsa nila sa semifinals.
Bagsak ang Indonesia sa 1-3 marka.
Hinablot naman ng Kazakhstan ang huling semifinals seat matapos talunin ang Hong Kong, 25-17, 25-18, 25-4, para sa kanilang 3-1 kartada sa Pool B sa event na suportado ng Meralco, PLDT, Smart, Akari, AyalaLand, Nuvali, Foton, POC, PSC, Mikasa, Senoh, Asics, Maynilad, Makati Shangri-La, Rebisco, Cignal, OneSports, OneSports+ at PilipinasLive.
Pumalo si Sana Anarkulova ng 19 points at may 16 markers si Zhanna Syroyeshkina sa torneong inorganisa ng Philippine National Volleyball Federation (PNVF) sa ilalim ni president Ramon “Tats” Suzara.
Samantala, tuluyan nang winalis ng Alas Pilipinas ang Pool A matapos igupo ang Chinese Taipei, 25-13, 25-21, 25-19.
Makakalaban ng Alas Pilipinas sa crossover semis ang Kazakhstan habang magsasagupa ang Vietnam at Australia.
- Latest
