Obiena hahataw sa Europe

MANILA, Philippines — Aarangkada si Asian Games gold medalist at Asian record holder Ernest “EJ” Obiena sa iba’t ibang indoor tournaments sa Europe kabilang na ang prestihiyosong World Athletics Indoor Championships.

Lalarga ang world No. 2 pole vaulter na si Obiena sa tatlong malalaking torneo bilang paghahanda nito sa Olympic Games na idaraos sa Paris, France sa Hulyo.

Sisimulan ni Obiena ang indoor season sa paglahok nito sa Memorijal Josip Gašparac tournament na gaganapin sa Pebrero 20 at 21 sa Osijek, Croatia.

“Joining the indoor season party next week in Osijek, Croatia,” ani Obiena.

Maliban sa Croatia, darayo rin si Obiena sa Berlin, Germany para naman magpartisipa sa ISTAF Indoor 2024 event na idaraos naman sa Mercedes-Benz Arena sa Pebrero 23.

Kasama rin sa mga lalahukan ni Obiena ang World Athletics Indoor Championships sa Marso 3 sa Emirates Arena sa Glasgow, Scotland.

Inaasahang madaragdagan pa ito sa mga susunod na linggo.

“A few more stuff,” ani Obiena.

Nakapasok sa Paris Olympics ang reigning Athlete of the Year na si Obiena matapos maabot ang Olympic standard na 5.82 meters sa Bauhaus Galan sa Stockholm, Sweden noong nakaraang taon.