Harden, George binuhat ang Clippers sa panalo

LOS ANGELES — Inis­kor ni James Harden ang 20 sa kanyang 29 points sa first half para pa­­munuan ang Clippers sa 113-104 paggupo sa Charlotte Hornets at tapusin ang kanilang two-game lo­­sing skid.

Nagdagdag si Paul George ng 25 points at humakot si Ivica Zubac ng 18 points at 14 rebounds para sa unang panalo ng Los Angeles (18-12) sa huling tatlong laro na wala si Ka­whi Leonard (left hip contusion).

Nauna na silang nagta­la ng nine-game winning streak bago minalas.

Binanderahan ni Miles Bridges ang Charlotte (7-21) sa kanyang 21 points at 11 rebounds, habang may tig-18 markers sina Terry Rozier at P.J. Wa­shington.

Inilaglag ng Clippers ang Hornets sa pang-wa­long dikit na kamalasan.

Ilang beses nakadikit ang Charlotte mula sa isang double-digit deficit bago naghulog ang Los Angeles ng isang 19-2 bomba para iposte ang 103-93 bentahe sa huling 3:58 minuto ng fourth pe­riod.

Ang three-pointer ni George sa natitirang 1:26 mi­nuto ang nagbigay sa Clippers ng 111-100 abante laban sa Hornets.

Sa Portland, humataw si Anfernee Simons ng 29 points para akayin ang Trail Blazers (8-21) sa 130-113 paggulat sa Sacramento Kings (17-12).

Sa Oklahoma City, nag­pasabog si Shai Gilgeous-Alexander ng 34 points, habang may 21 mar­kers si Jalen Williams para banderahan ang Thunder (19-9) sa 129-106 paglampaso sa Minnesota Timberwolves (22-7).

Sa San Antonio, ku­mo­­lekta si Lauri Markka­nen ng 31 points at 12 re­bounds sa 130-118 do­mi­nasyon ng Utah Jazz (13-18) sa Spurs (4-25).