Kailangang mapigilan ng Suns si Giannis

MILWAUKEE — Kailangan ng Phoenix Suns na makahanap ng solusyon para pigilan si Bucks’ star forward Giannis Antetokounmpo.

Humataw ang two-time NBA Most Valuable Player ng 41 points sa 120-110 pagresbak ng Milwaukee sa Phoenix sa Game Three ng NBA Finals noong Lunes (Manila time) para makaiwas sa 0-3 pagkakalubog sa best-of-seven championship series.

“We had to throw a lot of different things at them and it led to us scramb-ling. We have enough bodies to get that job done. We just got to do it collectively and be better individually,” ani Suns’ forward Jae Crowder.

Nakatakda ang Game Four bukas (Manila time) kung saan hangad ng Bucks na makatabla sa 2-2.

Sa nasabing kabiguan ng Phoenix sa Game Three ay tumipa lamang si shooting guard Devin Booker ng 10 points mula sa mahinang 3-of-14 fieldgoal shooting.

“I can get better (shots). We’ll make that happen,” pagtiyak ni Booker. “We’re going to get back right and be ready Wednesday. We have to come in with the energy and effort.”

Maliban kay Booker, naging problema rin ng Suns ang pagkakalagay ni center Deandre Ayton sa foul trouble.

“He had a good game going, but the foul trouble didn’t allow for him to continue it,” sabi ni Phoenix coach Monty Williams. “We expect him to play that way again.”