Pang-18 na ni De Los Santos
MANILA, Philippines — Lumobo na sa 18 gintong medalya ang nahahakot ni Orencio James De Los Santos sa taong ito matapos pagharian ang dalawa pang online tournaments.
Nangibabaw si De Los Santos sa men’s individual seniors kata ng Euro Grand Prix eTournament kung saan iginupo nito si Domont Matias Moreno ng Switzerland sa finals, 25.46-24.32.
Ipinagpatuloy ni De Los Santos ang dominasyon nito sa Katana Intercontinental League nang muli nitong pataubin si Moreno sa gold-medal match sa bendisyon ng 27.18-26.32 desisyon.
Sa kabuuan, may 54 gintong medalya na si De Los Santos sapul nang sumalang ito sa online tournaments noong nakaraang taon. Inaasahang madaragdagan pa ang kaban ng ginto ni De Los Santos sa pagsabak nito sa Okinawa e-Tournament World Series.
- Latest
