Ramdam ng PSC si Tolentino

MANILA, Philippines — Ramdam ng Philippine Sports Commission (PSC) ang pagnanais ni Philippine Olympic Committee president Abraham ‘Bambol’ Tolentino na maibalik nang buo ang monthly allo­wance ng mga national athletes at coaches.

Sinabi kamakalawa ni Tolentino, ang 8th District Rep. ng Cavite, na magla-lobby siya sa Kongeso para mabawi ang pondo ng mga national athletes at coaches sa proposed extension ng “Bayanihan to Heal as One Act.’’

Pinasalamatan siya ng PSC sa kanyang pagpapahalaga sa mga nagawa ng national athletes at coaches.

“We fully understand the concern of POC president Cong. Bambol Tolentino considering the excellent performance of the Team Phi-lippines in the last SEA Games, but (PSC) chairman (William Ramirez) assured the POC president and Sen. Bong Go that the allowances will be returned to the athletes and coaches once everything is back to normal,” ani PSC Executive Director Atty. Guillermo Iroy kahapon.

Inilalaban ni Tolentino ang pagkopo ng Team Philippines sa overall championship ng nakaraang SEA Games noong Disyembre para maibalik sa mga national athletes at coaches ang kabuuan ng kanilang nabawasang monthly allowances.

Ang P596 millyon ng PSC mula sa National Sports Development Fund (NSDF) at P773 milyon sa General Appropriations Act (GAA) ay inilipat ng Department of Budget and Management (DBM) para sa paglaban ng gobyerno sa coronavirus disease (COVID-19). Sa NSDF nagmumula ang allowances ng mga national athletes at coaches bukod pa ang gastos sa foreign training at competition at sa GAA galing ang suweldo ng mga PSC employees at maintenance ng mga pasilidad.

Dahil sa COVID-19 pandemic ay pinauwi ng PSC ang mga atleta at coaches sa kanilang mga probinsiya kasunod ang pansamantalang pagpapasara sa mga training facilities.

Ang Ninoy Aquino Stadium at Rizal Memorial Coliseum sa Malate, Manila ay pansamantalang ginawang pasilidad para sa mga COVID-19 patients.