Bautista wagi sa Japanese patungo sa second round

MANILA, Philippines — Naitakas ni Southeast Asian Games bronze medalist Ian Clark Bautista ang 3-2 split decision win laban kay Japanese Ha­yato Tsutsumi papasok sa second round ng men’s featherweight sa 2020 Asian-Oceanian Conti­nen­tal Olympic Quali­fying Tournament kaha­pon sa Prince Hamzah Hall sa Amman, Jordan.

Nakuha ni Bautista ang boto ng tatlong hura­do mula sa Ukraine (29-28), Colombia (30-27) at Bulgaria (28-28), habang pumanig sa Japanese figh­ter ang mga judges ga­ling Ireland (28-29) at Morocco (28-29).

“Nagkapaan muna ka­mi sa umpisa ng laban ka­ya medyo naunahan ako, pero nakabawi naman ka­agad ako sa second and third rounds. Magaling din naman siya,” sabi ng 25-anyos na si Bautista.

Ngunit mapapalaban nang husto sa second round si Bautista dahil ma­kakasagupa niya si reigning SEA Games champion Chatchai Butdee ng Thailand na naka­kuha ng opening-round bye dahil sa kanyang hawak na No. 3 seed.

Si Butdee ang tumalo kay Bautista sa semifinals noong 2019 SEA Games sa Maynila dahilan para magkasya ang Pinoy pug sa tansong medalya.

Una nang nakasiguro ng tiket sa second round sina AIBA Men’s World Championship silver win­ner Eumir Felix Marcial (men’s middleweight class), James Palicte (men’s light welterweight) at Carlo Paalam (men’s flyweight) matapos makakuha ng byes sa kani-kanilang dibisyon.

Kaya naman inaasa­hang ibubuhos ni Bautista ang lahat upang maka­ba­wi sa Thai bet.

Nakatakda namang ha­rapin nina 2019 AIBA Women’s World Championship gold medalist Nes­thy Petecio at veteran campaigner Risa Pasuit ang kani-kanilang karibal ngayong gabi.

Sasagupain ni Petecio si Krismi Langkapura­ya­lage ng Sri Lanka sa second round ng wo­men’s featherweight at lalaba­nan ni Pasuit si Hamamoto Saya ng Japan sa first round ng women’s lightweight category.