Parks itatampok ng TNT Katropa sa pagsagupa sa Brgy. Ginebra

MANILA, Philippines — Mula sa Blackwater ay isusuot ni No. 2 overall pick Bobby Ray Parks, ang uniporme ng TNT Katropa.

Ipaparada ng Tropang Texters si Parks sa pagsagupa nila sa Gi­nebra Gin Kings nga­yong alas-7 ng gabi matapos ang laro ng Meralco Bolts at Columbian Dyip sa alas-4:30 ng hapon sa 2019 PBA Go­vernor’s Cup sa Smart Araneta Co­liseum.

Nahugot ng TNT Ka­tropa ang 6-foot-4 at 26-anyos na si Parks mula sa Blackwater kapalit nina Don Trollano at Anthony Se­merad at isang 2021 first round draft pick.

Ang anak ni seven-time PBA Best Import Bobby Parks ang inaasahang sasalo sa trabaho ni star guard Jayson Castro (calf injury).

“Ray is a legit two-way player. He is better de­­fensively than he is of­fen­sively,” sabi ni coach Bong Ravena kay Parks na makakatuwang sina im­­­port KJ Mc­Da­niels, RR Po­goy, Troy Rosario at Mike Digregorio, kakam­pi niya sa Elite.

Sina import Justin Brownlee, GFreg Slaughter, Japeth Aguilar, Stanley Pringle, LA Tenorio at Scottie Thompson ang itatapat naman ng Gin Kings.

Kapwa nagmula sa ka­biguan ang TNT Katropa at Ginebra sa huli nilang mga laro.

Yumukod ang Tropang Texters kontra sa NLEX Road Warriors, 113-126, ha­bang nakalasap ang Gin Kings ng 77-101 pagka­talo sa Meralco.

Sa unang laro, target ng Bolts na mailista ang kanilang ikaapat na su­nod na panalo sa pagsa­gupa sa Dyip na nag­mula sa kabiguan.

Sa kanilang pagdurog sa Ginebra ay humakot si PBA Best Import Allen Durham ng 39 points at 12 rebounds para sa Meralco ni one-time PBA Grand Slam champion coach Norman Black.

Ayon kay Durham, na­­katuon na ang kanyang isip laban sa Columbian, nagmula sa 103-118 pagkatalo sa nagdedepensang Magnolia Hotshots.

“We’ve got three more games. We have to fi­nish the eliminations and fi­nish strong going to the quar­terfinals and stuff like that,” sabi ni Durham na mu­­ling makakatulong si­­na 6’8 center Raymond Al­mazan, Allein Maliksi at guards Chris Newsome at Ba­ser Amer.