CSB Blazers, Ateneo Eagles nakalapit sa Collegiate Finals
MANILA, Philippines — Isang panalo na lamang ang kailangan ng College of Saint Benilde Lady Blazers at Ateneo Lady Eagles para makalusot tungo sa Finals ng Premier Volleyball League Collegiate Conference matapos gibain ang kani-kanilang kalaban.
Natakasan ng Lady Blazers ang Adamson Lady Falcons, 26-24, 29-27, 17-25, 21-25, 15-13, habang pinadapa naman ng Lady Eagles ang UST Golden Tigresses, 25-15, 26-28, 25-16, 25-18, sa Game 1 ng kani-kanilang best-of-three semifinals series kahapon sa The Arena sa San Juan City.
Nag-init para sa Lady Blazers ang senior spiker n na si Klaris Abriam na nagrehistro ng 27 points at 16 digs para akayin ang koponan na manakaw ang panalo matapos ang pagbabantang pagbabalik ng Lady Falcons nang sikwatin ang third at fourth set na nag-puwersa sa isang decider.
Tumipa rin ng 23 at 12 marka sina Gayle Pascual at Mycah Go para tulungan ang tropa na ipalasap sa Adamson ang una nitong kabiguan sa torneo.
Pinatikim din ng Lady Eagles sa UST ang una nitong kamalasan sa liga sa pangunguna ng super rookie na si Faith Nisperos.
- Latest
