Chua umusad sa 4th round ng World 10-Ball

MANILA, Philippines — Naitala ni Johann Chua ang ikatlong sunod na panalo upang umusad sa fourth round ng winner’s bracket sa 2019 Predator World 10-Ball Championship na ginaganap sa Rio All-Suite Hotel and Casino sa Las Vegas, Nevada.

Isinama ni Chua si Yu Hsuan Cheng ng Chinese-Taipei sa mga nabiktima nito matapos iselyo ang 8-5 panalo sa third round ng torneong nagpapatupad ng double-elimination format.

Una nang tinalo ni Chua ang kababayang si Raymund Faraon sa first round (8-5) at top seed Joshua Filler ng Germany sa second round (8-1).

Makakaharap ni Chua sa fourth round si Chang Jung-Lin ng Chinese-Taipei na nanalo sa katropang si King-Ling Yip  sa first round (8-3) at kina Josh Roberts ng Amerika sa second round (8-0) at Chris Melling ng Great Britain sa third round (8-0).

Laglag naman sa lo-sers’ bracket sina Filipino-Canadian Alex Pagulayan, dating world champion Carlo Biado, Jeffrey Ignacio, Warren Kiamco at Zoren James Aranas.

Kailangang ipanalo ng mga Pinoy cue masters ang kanilang mga asignatura sa losers’ bracket upang manatiling buhay ang kanilang kampanya.