Lady Tams, Lady Bulldogs target ang unang panalo

MANILA, Philippines – Sisimulan ng 2018 se­mifinalists na Far Eas­tern University Lady Ta­maraws at National Uni­versity Lady Bulldogs ang  kanilang mga kampanya sa pagbubukas ng UAAP Season 81 women’s volleyball tournament sa FilOil Flying V Arena sa San Juan City.

Haharapin ng Season 80 runner-up Lady Ta­maraws ang fourth pla­cer Lady Bulldogs sa main game ngayong alas-4 ng hapon matapos ang laban ng University of the East Lady Red Warriors at University of the Philippines Lady Ma­roons sa alas-2.

Sa men’s division, bu­buksan ng NU Bul­l­dogs ang pagdedepensa sa korona sa pakikipag­tuos sa FEU Tamaraws sa alas-10 ng umaga, ha­­bang maghaharap ang UE Red Warriors at UP Fighting Ma­­roons sa alas-8 ng uma­ga.

“Maganda  ang nangyari nang makapasok kami sa Finals last year. It was our first after 10 years. The experiences  na gusto namin at that point, malaking ba­gay ‘yun para sa aming kampan­ya this season,” sa­bi ni FEU head coach George Pascua.

Matapos noong 2008 ay muling nakapasok sa Finals ang Lady Ta­maraws sa nakaraang taon ngunit winalis naman sila ng ‘three-peat’ champions De La Salle Lady Archers, 2-0, sa ka­nilang best-of-three titleseries.

“Ang Season 80 ay pa­rang turning point na­min. Kumbaga, nagka­roon na kami ng idea. Nagkaroon na ng self-confidence ‘yung mga pla­yers. So ngayon, we are looking forward na mag-bounce back this season,” dagdag ni Pascua.

Nawala sa FEU si lea­­ding scorer Ber­na­deth Pons at sina libero Kyla Atienza at Chin-Chin Basas dahil sa in­jury, kaya sasandal si Pas­cua kina Jerilli Ma­la­banan, Celine Domingo, Heather Guino-o, Kyle Negrito, libero Bu­ding Duremdes, Angeli Ca­­yu­na, Czarina Carandang at sa mga baguhang sina Lycha Ebon, Elize Ronquillo at Lyka Bautista.

Sa panig naman ng Lady Bulldogs ay nawala na rin sina Jaja San­tiago, Aiko Urdas, libero Gayle Valdez, Jasmine Nabor, Jorelle Singh, Ro­ma Doromal at Risa Sato dahil sa academic issue kaya iItatapat ng bagong head coach na si Norman Miguel ang mga baguhang galing din sa ‘four-peat’ high school champion ng NU.

Pangunahan ng mga bata ngunit batak sa eks­peryensa na sina high school three-time Best Set­ter Joyme Cagande, Ivy Lacsina, Prin­cess Rob­les at li­be­ro Jennifer Nierva.

Makakasama nila ang mga beteranong si­­na Roselyn Doria, Au­drey Paran at Jonni Cha­vez.

“Sa akin naman, kahit rookies sila, I still take it an advantage ka­­­si galing naman sila sa champion team sa UA­AP high school. Al­though,  iba pa rin na­man siyempre ‘yung in­­tensity ng games sa college,” sabi ni Miguel sa mga baguhang Lady Bulldogs.