Live football games sa ABS-CBN S+A

MANILA, Philippines — Siguradong mag-iinit ang linggo ng Pinoy football fans sa “El Clasico” sa La Liga tampok ang FC Barcelona at Real Madrid na mapapanood ng LIVE sa ABS-CBN S+A.

Bago ang umaatikabong paghaharap ng dalawang koponan sa Camp Nou ng 11:10 pm sa Linggo (Oktubre 28), magtutuos muna sa English Premier League (EPL) ang Leicester at West Ham ng alas-12:25 hatinggabi habang bibisitahin naman ng 2017-2018 EPL champion na Manchester City ang Tottenham, LIVE ng alas-3:55 ng madaling araw sa Martes.

Siguradong tututukan ang paghaharap ng dala-wang higante ng Spanish football na Barcelona at Real Madrid sa kabila ng kawalan ng dalawa sa malalaking pangalan sa football ngayon. Ito ang unang “El Clasico” mula nang lumipat sa Juventus sa Serie A si Ro-naldo. Hindi rin makakapaglaro si Lionel Messi dahil sa tinamong injury kamakailan lang. Subalit hindi naman pahuhuli ang Uruguayan superstar na si Luis Suarez sa pangunguna sa Barca kontra kina Gareth Bale, Karim Benzema at 2018 Best FIFA Men’s Player of the Year Luka Modric.

 Samantala, magsasagupaan naman ang Paris Saint-Germaine at Marseille sa kanilang sariling cla-sico na tinaguriang “Le Classique” na mapapanood ng LIVE sa S+A sa Lunes sa alas-3:55 ng madaling araw. Mangunguna para sa PSG ang Brazilian star na si Neymar Jr. at 2018 FIFA World Cup star Kylian Mbappe, na naka-iskor na ng siyam na goal sa loob ng anim na laban, kontra kay Florian Thauvin ng Olympians, na nakapagbuslo naman ng pitong goal ngayong taon.