PBA Legends games ikinasa

MANILA, Philippines – Kasado na ang double-header na magtatakda sa bakbakan ng mga dating champion teams ng San Miguel Beer at Alaska Milk at ang pagtutuos ng Barangay Ginebra at Purefoods.

Itinakda sa Setyembre sa Smart Araneta Coliseum, ang nasabing classic legends showcase ay inisyal na proyekto ng Samahan ng mga Dating Propesyonal na Basketbolista ng Pilipinas sa pakikipagtulungan sa Philippine Basketball Association.

“We sought the PBA’s support and they gave us a warm reception especially because this in an event for a cause,” sabi ni dating Crispa superstar Atoy Co, ang presidente ng foundation na naghahangad makalikom ng pondo para sa mga dating PBA players na nalaglag sa kahirapan.

Nasa grupo din sina dating Crispa star Philip Cezar (vice president), dating Toyota player Ed Cordero (secretary), Allan Caidic (treasurer), Alvin Patrimonio, Kenneth Duremdes, Jojo Lastimosa, Pido Jarencio at Art dela Cruz.

“They put up a foundation that will be ready to help their peers. We’re cooperating with them and we’re giving them all-out support,” wika ni PBA Commissioner Willie Marcial.

Nakipag-usap sina Co kay Marcial noong Martes sa PBA office sa Libis, Quezon City.

“Tutulungan natin lumakas ‘yung foundation. Kapag lumakas yon, marami silang matutulungan na nangangaila-ngang dating kasamahan,” ani Marcial “For the initial project featuring former stars of Ginebra, Purefoods, San Miguel Beer and Alaska, sila ang bahala sa players while the PBA takes care of the operation and promotions. The proceeds go to the foundation,” dagdag pa niya.

Itatampok sa legends game sina Fernandez, Caidic, Lastimosa, Patrimonio, Duremdes, Ato Agustin, Hector Calma, Johnny Abarrientos, Bong Hawkins, Jeffrey Cariaso, Jerry Codiñera, Chito Loyzaga, Vince Hizon, Marlou Aquino, Noli Locsin, Bal David at iba pa.

Nauna nang nagdaos ng classic legends games, kasama na ang Crispa-Toyota reunion game noong 2003 at ang pasikatan ng mga 25 PBA greatest players.