Adamson lady batters dumiretso sa ika-63 sunod na panalo

MANILA, Philippines – Pinabagsak ng Adamson University ang University of Santo Tomas, 10-0 sa apat na innings para iposte ang kanilang pang-63 sunod na panalo sa UAAP Season 78 softball tournament kahapon sa Rizal Memorial Baseball Stadium.

Sa likod ng pagbibida ni Queenie Sabobo sa second inning ay itinala ng five-peat champion na Lady Falcons ang 6-0 bentahe laban sa Tigresses.

Si Sabobo, ang reigning Home Run queen, ay naglista rin ng limang RBIs para pangunahan ang Adamson na nakahugot pa ng solid pitching kay two-time MVP Analie Benjamen.

Samantala, tinakasan ng National University ang Ateneo, 2-1 para sa kanilang 2-0 record habang nilusutan naman ng University of the East ang De La Salle, 4-3 para makapasok sa win column.

Tumabla ang Lady Warriors sa Tigresses sa magkatulad nilang 1-1 karta at nalasap ng Lady Eagles at Lady Archers ang kanilang pangalawang dikit na kabiguan.