Pacquiao ibinitin ang kanyang desisyon

MANILA, Philippines – Hindi pa handa si Man­ny Pacquiao na pa­nga­lanan ang kanyang magiging pinakahuling ka­laban.

Ito ang sinabi ni Fred Sternburg, ang spokesman ni Bob Arum ng Top Rank Promotions.

“I was asked to tell you on Bob’s behalf that, unfortunately, Top Rank will not have an announcement on truTV as originally planned as Manny is not ready to make a decision on his opponent yet,” wika ni Sternburg.

Nauna nang inihayag ni Arum na gagawin ang announcement ni Pacquiao sa championship fight nina Nonito ‘The Fi­lipino Flash’ Donaire, Jr. at Cesar Juarez sa Puerto Rico kahapon.

Ngunit walang nang­ya­ring pahayag si Arum.

Si Timothy Bradley, Jr., ang kasalukuyang World Boxing Organization welterweight king, ang tumayong analyst sa na­turang Donaire-Juarez fight.

Sinabi ni Bradley kamakalawa na mas gusto niyang labanan si Puerto Rican star Miguel Cotto kesa gawin ang ‘trilogy’ ni­la ni Pacquiao.

Sinabi ni Arum na nai­padala na niya kay Pac­quiao (57-6-2, 38 KOs) ang mga fight tapes nina Bradley (33-1-1, 13 KOs), light welterweight titlist Terence Crawford (27-0-0, 19 KOs) at Amir Khan (31-3-0, 19 KOs) na mas piniling hamunin si IBF titlist Kell Brook.

Unang tinalo ni Bradley si Pacquiao sa pamamagitan ng kontrobersyal na split decision no­ong 2012 bago siya ni­resbakan ni ‘Pacman’ sa ka­nilang rematch noong 2014.