Fresh Fighters iiwas na malagay sa ilalim sa pagharap sa Liver Marin sa Foundation Cup

Laro Ngayon (JCSGO Gym)

11 a.m. – Tanduay Light vs AMA University

1p.m. – ATC Liver Marin vs Hapee

MANILA, Philippines – Iiwas ang Hapee Fresh Fighters na malagay sa huling puwesto sa pagharap sa ATC Liver Marin sa PBA D-League Foundation Cup ngayon sa JCSGO Gym sa Cubao, Quezon City.

May 0-1 baraha ang Aspirants’ Cup champion na Fresh Fighters at balak nilang hindi na palawigin ang losing slump sa pag-asinta ng panalo laban sa baguhang Liver Marin sa tampok na laro sa ala-1 ng hapon.

Unang laro sa alas-11 ng umaga ay sa hanay ng Tanduay Light Rhum Masters at AMA University Titans.

May 1-1 karta ang Rhum Masters at ang Titans para makasalo sa limang koponan na nasa ikatlong puwesto kasunod ng Cebuana Lhuillier Gems at Ke­ra­Mix Mixers na may 3-0 at 2-1 karta.

Inaasahang magi­ging mahigpitan ang ta­gisang ito lalo pa’t ang dalawang koponan ay pa­rehong may sinasan­da­lang manlalaro.

Isa sa sisipating manlalaro ay si Jay-R Taganas na humablot ng 29 rebounds sa tinamong 70-75 pag­katalo ng koponan sa Cagayan Valley Rising Suns.

Inaasahan na gagamitin ng Hapee ang angking karanasan bilang kampeon sa Aspirants’ Cup para pag-initin ang paghahabol sa ikalawang sunod na kam­peonato sa liga.

Sina Earl Scottie Thompson, Chris Newsome at Troy Rosario ang mga magdadala sa Fresh Fighters pero makakatulong ng malaki kung ma­nu­numbalik na ang galing ni Bobby Ray Parks Jr. na nakabangon na mula sa shoulder injury.