1-game suspension kay Harden sa paninipa kay James

NEW YORK -- Pinatawan ng NBA ng one-game suspension without pay si Houston star James Harden dahil sa paninipa sa maselang bahagi ng katawan ni LeBron James.

Nagkabuhol ang All-Stars at Olympic teammates sa third quarter sa 105-103 panalo ng Houston laban sa Cleveland noong Linggo kung saan natumba si Harden at sinipa si James.

Tinawagan si Harden ng flagrant foul 1 dahil dito at itinaas ng NBA sa flagrant 2 noong Lunes na nangangahulugan ng automatic ejection kung ito ay itinawag sa nasabing laro.

Sinabi ng galit na galit na si James matapos ang laro na ang pagsipa ni Harden ay “not a basketball play’’ at dapat na tingnang mabuti ng liga.

Hindi maglalaro si Harden, ang NBA leading scorer at top MVP candidate sa pagharap ng Rockets sa bisitang Atlanta Hawks sa Martes.