2-1 lead asam ng Bullpups
Laro Ngayon (The Arena, San Juan City)
2 p.m. – NU vs Ateneo (jrs finals)
MANILA, Philippines – Matapos alisin ang bentaheng taglay ng kalaban, pagpupursigihan ng nagdedepensang National University Bullpups na makalamang sa Ateneo Blue Eaglets sa ikalawang laro sa 77th UAAP juniors basketball sa The Arena sa San Juan City.
Tinapos ng Bullpups ang 14-game winning streak ng Blue Eaglets mula sa 76-72 panalo noong nakaraang Biyernes para gawing best-of-three ang kanilang championship series.
Ngayong alas-2 ng hapon itinakda ang bakbakan at aasa ang Bullpups na magpapatuloy ang magandang ipinakita ng lahat ng sinasandalang mga manlalaro ni head coach Jeff Napa.
“Kung ano ang naipakita namin sa Game One ay dapat higitan namin ito sa Game Two dahil tiyak na babalik ang Ateneo,” wika ni Napa.
Si Mark Dyke ang huhugutang muli ng lakas ng NU matapos magtala ng 20 puntos, 17 rebounds at 3 blocks sa huling laro.
Mas magiging agresibo naman ang Ateneo na huhugot ng lakas mula sa kambal na sina Mike at Matt Nieto.
Ang dalawang Nieto ay gumawa ng 25 at 19 puntos, ayon sa pagkakasunod, ngunit kailangan nila na makitaan ng tamang tiyempo dahil naubos sila sa huling yugto na kung saan tuluyang nagdomina ang Bullpups.
- Latest
