5 sunod na panalo sa Grizzlies

MEMPHIS, Tenn. — Dumiretso sa kanilang panglimang sunod na panalo ang Memphis Grizzlies matapos ilampaso ang Denver Nuggets, 99-69, tampok ang 15 points at 17 rebounds ni Zach Randolph nitong Huwebes.

Nagdagdag naman si Jeff Green ng 13 points para sa arangkada ng Grizzlies.

Nilimitahan ng Grizz-lies ang Nuggets sa 11 points sa first quarter at hindi na hinayaang makalapit ang huli sa pagposte ni Randolph ang kanyang ika-10 sunod na double-double.

Tumipa sina Courtney Lee, Nick Calathes at Beno Udrih ng tig-11 points kasunod ang 10 ni Marc Gasol.

Pinamunuan naman nina Wilson Chandler at Kenneth Faried ang Denver sa kanilang tig-10 points.

Nalasap ng Nuggets ang pang-walo nilang kabiguan sa huli nilang siyam na laro.

Matapos ilista ang 19-point lead sa first period ay pinalobo pa ng Memphis ang kanilang kalamangan sa 50-35 sa halftime kung saan umiskor si Randolph ng 11 points.

Pinalaki pa ng Grizz-lies ang kanilang bentahe sa 74-49 patungo sa final period upang tuluyan nang ipagpag ang Nuggets.

Malaki pa sana ang ilalamang ng Memphis kundi lamang sa kanilang 10-of-16 sa free throw line kumpara sa 2-of-3 ng Denver sa first half.

Tinapos ng Grizzlies ang laro na may 18-of-27 shooting sa free throw line laban sa 9 of 10 ng Nuggets.

Sa Los Angeles, nagtala si  Jordan Hill ng 26 points at ipinuwersa ang ikalawang overtime sa pamamagitan ng clutch jumper at napigilan ng Los Angeles Lakers ang kanilang losing streak sa 9-games sa pamamamagitan ng 123-118 panalo kontra sa Chicago Bulls.

Umiskor si Wayne Ellington ng 23 points at nagdagdag si rookie Jordan Clarkson ng 18 para sa Lakers na nali-mitahan ang Bulls para sa kanilang unang panalo sapul noong Jan. 9.