NCAA-PC Accel Quantum/3XVI Player of the Week

MANILA, Philippines -  Sa pagpasok ng mahalagang ikalawang yugto, walang ibang dapat na sandalan ang isang koponan kungdi ang kanilang mga beterano.

Ito ang ginagawa ni Michael Mabulac kaya’t ang host Jose Rizal University Heavy Bombers ay nakasalo na sa ikalawang puwesto sa Arellano Chiefs sa 9-4 baraha.

Dalawang panalo ang pinangunahan ni Mabulac para sa Heavy Bombers sa nagdaang linggo para ibigay sa kanya ang  NCAA Press Corps ACCEL Quantum-3XVI Player of the Week.

“Medyo natagalan bago naipakita ni Michael ang kanyang pagiging beterano. Ngayong nakuha niya ang dating laro, naniniwala akong makakasabay kami sa ibang kalaban,” wika ni JRU coach Vergel Meneses.

Ang 6’4” center ay naghatid ng 17 puntos at 9 rebounds averages sa nakuhang panalo laban sa Lyceum Pirates (67-43) at sa Perpetual Help Altas (80-76 sa overtime).

Ang huling panalo ang nakatulong para maging palaban pa ang Heavy Bombers sa mahalagang twice-to-beat incentives na ibibigay sa dalawang ma-ngungunang koponan matapos ang eliminasyon.

Tinalo ni Mabulac  para sa citation sina Paolo Taha at Mark Romero ng Blazers.