Pacquiao at Cotto sabay na magsasanay sa training camp?
MANILA, Philippines - Kung maaari ay iniisip ni chief trainer Freddie Roach na pagsanayin sa isang training camp sina Manny Pacquiao at Miguel Cotto.
Plano ni Roach na magtayo ng training camps sa Manila at sa General Santos City para kina Pacquiao at Cotto.
Ngunit nilinaw ni Roach na hindi magsasanay nang sabay sina Pacquiao at Cotto.
“I would separate the times of the workouts. Because Miguel’s always on time and Manny’s always late,” wika ni Roach.
Naglaban na sina Pacquiao at Cotto noong 2009 kung saan tinalo ng Filipino world eight-division champion ang Puerto Rican para agawin ang suot nitong World Boxing Organization (WBO) welterweight crown via 12th-round stoppage.
Sinabi ni Roach na itatanong pa niya kay Cotto kung gusto nitong sumabay sa pagsasanay ni Pacquiao.
“I haven’t talked to Miguel about it yet, but he likes traveling a little bit,” wika ng five-time Trainer of the Year awardee.
Si Roach ang kasalukuyang trainer ni Cotto.
Nakatakdang itaya ni Pacquiao ang kanyang hawak na WBO welterweight crown laban kay Chris Algieri sa Nobyembre 22 sa Macau, China.
Ito ang ikalawang sunod na laban ni ‘Pacman’ ngayong taon matapos resbakan si Timothy Bradley, Jr. sa kanilang rematch noong Abril para bawiin ang WBO welterweight belt.
Kamakailan ay nagsumite ang 35-anyos at 5-foot-6 na si Pacquiao ng kanyang aplikasyon para sa darating na 2014 PBA Rookie Draft na nakatakda sa Agosto 24.
Si Pacquiao ay nauna nang hinirang ng Kia Motors bilang kanilang head coach sa darating na 40th season ng PBA.
Matapos naman talunin si Sergio Martinez para sa WBC middleweight title ay wala pang naitatakdang laban para kay Cotto.
- Latest
