Texters inilaglag ang Gin Kings sa Top Four

MANILA, Philippines - Bumangon ang Talk ‘N Text mula sa isang seven-point deficit sa huling apat na minuto para talunin ang Barangay Ginebra, 96-92, at kunin ang No. 1 spot sa quarterfinal round ng 2014 PBA Governors’ Cup ka­gabi sa Smart Araneta Coliseum.

Nagbida si balik-import Paul Harris para sa ikalawang sunod na panalo ng Tropang Texters sa kanyang 31 points, tampok dito ang 13-of-14 shooting sa free throw line, at 16 rebounds.

Nalasap naman ng Gin Kings ang kanilang panga­lawang dikit na kamalasan na naglaglag sa kanila sa Lo­wer Four.

Ang Top Four teams ang magbibitbit ng ‘twice-to-beat’ incentive sa quarterfinals.

Makakalaban ng No. 1 Talk ‘N Text ang No. 8 Ba­rako Bull sa quarterfinals, habang posible namang ma­upo ang Ginebra sa No. 5 o 6.

Kinuha ng Gin Kings ang 57-50 abante sa 4:33 mi­nuto ng fourth quarter bago inagaw ng Tropang Texters ang 83-79 bentahe sa 3:28 minuto.

Nakatabla ang Ginebra sa 83-83 mula sa basket at da­lawang free throws ni import Zach Mason sa hu­ling 2:05 kasunod ang pananalasa nina Harris at Jayson Cas­­tro para ilayo ang Talk ‘N Text sa 90-83 bentahe sa na­­titirang 35.0 segundo.

At mula dito ay hindi na nakadikit pa ang Gin Kings, nakahugot ng 18 points kay Japeth Aguilar ka­su­nod ang tig-15 nina Mason at Greg Slaughter.

Sa unang laro, tinalo ng Alaska ang Barako Bull, 90-87, para sa kanilang pangatlong dikit na ratsada.

Kumonekta si JVee Casio ng dalawang tres para ibi­gay sa Aces ang 88-75 kalamangan sa huling minuto ng final canto bago ito napaliit ng Energy Cola sa tatlong puntos sa pag­tatapos ng laro.

Kung tatalunin ng Rain or Shine ang San Mig Coffee ngayong alas-8 ng gabi ay maaaring makamit ng Alaska ang No. 4 seat at ang ‘twice-to-beat’ incentive sa quarters.