Malaking tagumpay para kay So

MANILA, Philippines - Kaagad pumayag si Wesley So sa isang mabilis na 12-move draw kay 2013 winner Zoltan Almasi ng Hungary para pormal na angkinin ang korona ng Capablanca Memorial 2014 kahapon sa Habana Riviera sa La Havana, Cuba.

Ito ang pinakamalaking panalo ng 20-anyos na si So kung saan siya nakahugot ng 13.4 rating points na mag-aangat sa kanyang ELO rating sa 2744.4 sa susunod na buwan.

Tinapos ni So ang torneo na may 6.5 points mula sa tatlong panalo niya kina Spaniard Francisco Vallejo Pons, Almasi at top seed at world No. 10 Leinier Dominguez Perez ng Cuba at pitong draws.

Nakipag-draw si Cuban Lazaro Bruzon Batista kay Dominguez para sa ikalawa at ikatlong puwesto bitbit ang 5.5 at 5.0 points, ayon sa pagkakasunod.