Perps, Blazing Animo nagpasikat sa Singapore cheerdance competition

MANILA, Philippines - Nagpamalas ang Perpetual Help at College of St. Benilde ng impresibong performance upang mag-uwi ng apat na gold medals at isang silver sa Asian Invitational Cheerleading Championships sa Singapore nitong weekend.

Nanguna ang NCAA cheerdance champions na Perps sa Coed Premier, Coed Elite at Group Stunts category at naka-silver sa Partner Stunts para maging best performing school sa annual event na kinilala ng International Cheer Union, ang world governing body ng sport.

Kumopo naman ang Blazing Animo ng gold sa All-Girls’ Elite category para sa impresibong performance ng mga Pinoy sa torneong nilahukan ng top-notch teams mula sa 10-bansa.

Ipinagmalaki ni Itos Valdez ng National Cheerleading Championship, ang natatanging national sports association para sa cheerleading sa bansa, ang naturang panalo ng Perpetual at St. Benilde.

Samantala, nakatutok naman ang bansa para sa paglahok sa ICU Worlds sa ESPN Sports Complex sa Walt Disney sa Orlando, Florida sa huling linggo ng Abril.

Ito ang unang pagkakataon na sasali ang Phl team sa event na ikinukunsidera bilang Olympics ng cheerleading dahil higit sa 100 bansa ang inaasahang lalahok dito.

Nagsumite naman ang NCAA ng formal bid para pamahalaan ang 1st Asian Universities and Schools Championships sa Nobyembre.