Southwestern U lusot sa St. Louis
MANILA, Philippines - Bumangon ang Southwestern University mula sa double match point na hinawakan ng St. Louis University tungo sa 25-20, 23-25, 25-15, 21-25, 19-17, tagumpay sa kauna-unahang five-setter sa Shakey’s V-League Season 11 First Conference kahapon sa The Arena sa San Juan City.
Abot-tanaw na ng rookie Lady Navigators ang sana’y unang panalo sa ligang inorganisa ng Sports Vision at suportado ng Shakey’s nang umabante sa 14-12 sa deciding fifth set.
Ngunit hindi nakuha ng koponan ang mahalagang panalo at bumigay sa pressure nang bumangon ang Lady Cobras.
Ang guest player na si Lutgarda Malaluan ay mayroong 15 puntos at siya ang tumayong bida sa CESAFI champion nang butatain niya si Krissian Tsuchiya bago tinapos ang laro sa kill.
Nagdomina rin ang FEU sa San Sebastian sa ikalawang laro, 25-21, 20-25, 25-11, 25-20, sa ligang may ayuda rin ng Accel, Mikasa at Akari.
May 20 kills at isang block si Bernadette Pons para sa Lady Tamaraws na nakasalo sa National University sa liderato sa Group B.
Nanguna sa SWU na kasalo ang Ateneo sa Group A, si Marlyn Llagoso sa 19 puntos mula sa 10 hits at 8 blocks habang sina Sheena Quino at Janelle Cabahug ay may tig-12 puntos. (AT)
- Latest
