NLEX magpapalakas sa second spot

MANILA, Philippines - Patitibayin pa ng NLEX Road Warriors ang kanilang laban para sa awtomatikong puwesto sa semifinals sa PBA D-League Aspirant’s Cup sa pagsukat sa mainit ding Café France ngayon sa JCSGO Gym sa Cubao, Quezon City.

May 6-1 baraha ang Road Warriors, kasama ang tatlong sunod na pa­­nalo at kung madugtu­ngan pa ito ay lalakas ang kapit sa ikalawang pu­westo kasunod ng pahi­ngang Big Chill na may 10-1 baraha.

Ang laro ay matutung­hayan sa ganap na alas-2 ng hapon matapos ang su­katan ng mga talsik ng Wang’s Basketball at NU-Banco de Oro.

Huling laro sa alas-4 ay sa hanay ng Cebuana Lhuillier at Arellano University.

Ang Gems ay nanga­ngailangan na walisin ang apat na laro para magka­roon pa ng buhay ang pag­hahabol sa puwesto sa quarterfinals.

Ito na ang ikalawang su­nod na laro ng Road Warriors sapul nang pumasok ang 2014 at haha­rapin nila ang Bakers bit­bit ang 96-80 at 89-70 pananaig sa Wang’s Basketball at Jumbo Plastic.

Hindi nagkukumpiyansa si NLEX head coach Bo­yet Fernandez da­hil ang Bakers ay nanalo rin sa kanilang huling apat na laro.

“Café France is pla­ying well especially since they have a chance to make the playoffs. They are a dangerous team,” ani Fernandez.

Isa sa sandata ng Café France ay ang kanilang ma­tinding depensa.

Ibabandera ng Road Warriors si Garvo Lanete na naghatid ng 51 puntos sa huling dalawang laro.