Sa boksing at Basketball nagkakaintindihan ang mga Pinoy

Sa pagtatapos ng taong 2013, baunin natin sa darating na 2014 ang magaganda at di magandang pangyayari sa nakalipas na taon.

Gawin nating inspirasyon ang naging tagumpay ng Gilas Pilipinas sa FIBA-Asia Men’s Basketball Championships at ni Manny Pacquiao kontra kay Brandon ‘Bambam’ Rios.

Magsilbing aral naman sa atin ang nangyari sa Southeast Asian Games sa Myanmar.

Nalaglag tayo sa pinakamasamang pagtatapos ng bansa sa beinnial meet na No. 7 matapos mag-uwi ng 29-medalya ang ipinadalang maliit na de-legasyon na binubuo lamang ng 210 atleta.

***

Dati-rati’y sa larong boksing lang nagkakaintindihan ang mga Pinoy, ngayon  pati sa basketball ay may pagkakaisa na ang bawat Filipino.

Noon ay nagkakaisa ang sambayanang Pinoy sa pagsuporta kay Manny Pacquiao tuwing may laban ang Sarangani Congressman.

Nagkakaisa na rin ngayon ang mga Pinoy sa basketball na nakita sa pagsuporta sa Gilas Pilipinas na kumampanya sa FIBA-Asia Men’s Basketball Championships noong Agosto.

Kahit ang mga walang hilig sa basketball ay nagkainteres sa Gilas.

Marami na rin ang nahihilig sa volleyball na nakakapuno na ng MOA Arena.