Big Chill tangka ang ikatlong sunod na panalo

Laro NGAYON

(Trinity University of Asia Gym)

2 p.m. – Big Chill vs Zambales M-Builders

4 p.m. – Hog’s Breath Café vs Cafe France

MANILA, Philippines - Ikatlong sunod na panalo ang target ng Big Chill para mapagtibay ang kapit sa unang puwesto sa PBA D-League Aspirants’ Cup ngayon sa Trinity University of Asia Gym sa Quezon City.

Kalaro ng Superchargers ang Zambales M-Builders sa unang laro sa ganap na ika-2 ng hapon at hahagipin din ng koponan ang ika-siyam na panalo sa 10 laro upang makalayo pa sa mga naghahabol.

Ang Hog’s Breath ay sasalang din laban sa Café France dakong alas-4 ng hapon at hanap na makabangon agad matapos tanggapin ang unang kabiguan sa kamay ng Jumbo Plastic, 70-87, noong nakaraang linggo.

Dapat na manumbalik ang dating sigla ng  manla-laro ni coach Caloy Garcia dahil ang Bakers ay may three-game winning streak at kailangan ang panalo upang tumatag ang paghahabol sa anim na koponang aabante sa playoffs.

May 6-3 karta ang tropa ni coach Edgar Macaraya at kung makukuha ang ikapitong panalo ay papantayan nila ang pa-hingang Cagayan Valley sa ikalimang puwesto.

Huling tinalo ng tropa ni coach Robert Sison ang Rising Suns, 89-75 at nasabayan ito ng pagluhod ng Razorbacks upang makita ng Big Chill na nasa unahan uli sila sa 14-koponang liga.

“Magandang break ito sa amin pero mangangahulugan din ito na dapat ay itaas pa namin ang lebel ng paglalaro dahil kaila-ngan ipanalo pa namin ang nalalabing mga laro para makuha ang outright semifinals,” wika ni Sison.