La Salle vs San Beda para sa Yolanda victims

MANILA, Philippines - Nakatakdang magtuos ang mga collegiate champions na La Salle Green Archers ng UAAP at ang San Beda Red Lions ng NCAA sa Disyembre 7 sa Smart-Araneta Coliseum sa layuning makaipon ng pondo na itutulong para sa mga biktima ng bagyong Yolanda.

“We all know all of us like to see play the UAAP champion play the NCAA champion who gets to win,” wika kahapon ni Joey Guillermo ng nag-oorganisang Filoil Flying V Sports.

“But what’s more meaningful about this game is that its for a cause,” dagdag pa nito.

Nauna nang naglaban ang University of Santo Tomas at Letran, mga runners up sa nakaraang UAAP at NCAA season, ayon sa pagkakasunod, sa Letran Gym para tumulong din sa relief effort sa mga nasalanta ng bagyo.

Kamakailan ay nagdaos ang San Beda ng isang bonfire para makakuha ng tulong, habang nauna nang nagbigay ang NCAA ng pondo sa social arm ng TV5.

Sinikwat ng Green Archers at ng Red Lions ang kanilang mga league titles matapos talunin ang Tigers at ang Knights sa kani-kanilang championship series.

Ihaharap ng La Salle ni head coach Juno Sauler sina Finals MVP Jeron Teng, Arnold Van Opstal, Norbert Torres at Almond Vosotros, habang itatapat ng San Beda ni mentor Boyet Fernandez sina Rome dela Rosa, Ola Adeogun, Arthur dela Cruz at Baser Amer.

“We look forward to that game and at the same time to lend a helping hand to our unfortunate countrymen,” sabi ni Fernandez.