Tinalo ang Pacers para sa 3-2 lead: Isa na langpara sa Heat

MIAMI -- Nakabinbin ang kanilang tsansang makapaglaro sa NBA Finals sa ikatlong sunod na pagkakataon, kinailangan ng Miami Heat ang ratsada ni LeBron James sa third quarter para makuha ang 90-79 panalo laban sa Indiana Pacers sa Game 5.

Kumolekta si LeBron James ng 30 points, 8 rebounds at 6 assists para sa 3-2 abante ng Miami sa kanilang Eastern Conference championship series ng Indiana.

“I’m one step away from doing it once again. It’s not promised. It’s not promised at all. I made a tough decision,” ani James. “Obviously, I think we all know the story. I envisioned something that was bigger as far as a team ... and we’ve got an opportunity as a team, once again, for the third year straight to make a trip to the NBA Finals.”

May pagkakataon ang Heat na wakasan ang kanilang serye ng Pacers sa Game 6 sa Sabado sa  Indianapolis.

Kung makakatabla naman ang Indiana sa Game 6 ay itatakda ang Game 7 sa Lunes sa Miami.

Ang mananalo sa serye ang siyang sasagupa sa naghihintay na San Antonio Spurs sa NBA Finals na sisimulan sa Hunyo 6.

Hindi pa natatalo ng dalawang sunod ang Heat matapos noong Enero 8 at 10 nang yumukod sa Pacers at Portland Trail Blazers.

Kinontrol ng Heat ang laro nang maghulog ng isang 19-4 atake para iwanan ang Pacers sa pagtatapos ng third period, 70-57.

Sa nasabing yugto ay umiskor si James ng 16 points, habang may 5-of-6 fieldgoals shooting naman si Udonis Haslem.

“We had 24 minutes to play for our livelihoods,’’ wika ni Haslem. “And that’s how we played in the second half.’’

Tumapos si Haslem na may 16 points kasunod ang 12 ni Mario Chalmers at 10 ni Dwyane Wade para sa Miami na sumibak sa Indiana, 4-2, sa kanilang second-round matchup noong nakaraang season.

Pinangunahan ni Paul George ang Pacers mula sa kanyang 27 points, 11 rebounds at 5 assists.

Humakot naman si center Roy Hibbert ng 22 points at 6 rebounds.