Miami nakabawi agad

NEW ORLEANS -- Bumangon ang Miami Heat mu­la sa kanilang unang kabiguan sa loob ng dala­wang buwan para muling magsimula ng isa na namang winning streak.

Tumipa si LeBron James ng 36 points, kasama di­to ang anim na magkakasunod na 3-pointers sa halos anim na minuto sa first half, upang pamunuan ang Heat sa 108-89 paggiba laban sa New Orleans Hornets noong Biyernes ng gabi.

Noong Miyerkules ay nagwakas ang 27-game win­ning streak ng Miami nang matalo sa Chicago Bulls.

Ang panalo naman ng Heat kontra sa Hornets ang nagbigay sa kanila ng top seed para sa Eastern Conference Playoffs.

Nag-ambag si Dwyane Wade ng 17 points at 7 assists para sa Heat.

Umiskor naman si Ryan Anderson ng 20 points mu­la sa bench para sa Hornets, habang may 17 si Eric Gordon.

Sa San Antonio, nagposte si All-Star Tim Duncan ng season-high 34 points, tampok dito ang game-winning three-point play sa huling 2.2 segundo, para igiya ang Spurs sa 104-102 panalo laban sa Los Angeles Clip­pers.

Nagtala naman si Tony Parker ng 24 points at 8 assists para sa San Antonio.

Binanderahan ni Blake Griffin ang Clippers mula sa kanyang 18 points kasunod ang 16 ni Jamal Crawford at 14 ni Chris Paul.