UAAP roundup: DLSU lady spikers pasok na sa semis

MANILA, Philippines - Inangkin ng two-time defending champion La Salle ang unang puwesto sa Final Four sa women’s volleyball sa pamamagitan ng 25-17, 25-16, 25-23, panalo sa FEU na ginawa noong Linggo sa The Are­na sa San Juan City.

Ikasampung sunod na panalo ito ng Lady Ar­chers matapos matalo sa UST sa unang asignatura para mailista ang ika-14 na sunod na pagkakataon na nasa semifinals ang ko­ponan mula nang ipairal ang Final Four sa liga noong 1993-94 season.

Kailangan na lamang ng koponan na maipanalo ang isa sa huling tatlong laro o matapos ng isa sa huling tatlong asignatura ang Adamson para ha­wakan ang mahalagang twice-to-beat advantage.

Nasa semifinals at may twice-to-beat advantage na rin ang FEU at host National University sa ka­lalakihan nang manalo sa magkahiwalay na laro.

Tinuhog ng nagdede­pensang Tamaraws ang UE, 25-15, 25-23, 25-19, bago kinagat ng Bulldogs ang Ateneo, 25-21, 25-20, 25-18, upang maisu­long ang nangungunang karta sa 10-1.

Ateneo batters sa finals

Naudlot man ang tinar­get na sweep sa elimination round, hindi naman nabigo ang Ateneo sa hangad na puwesto sa finals ng UAAP baseball nang kunin  ang 4-2 panalo sa nagdede­pensang National Univer­sity noong Linggo sa Rizal Memorial field.

Ang panalo ng Eagles, na pumangalawa noong nakaraang taon, ay pam­bawi matapos sorpresahin ng UP noong Huwebes, 8-6, upang magwakas ang pitong sunod na panalo.

May 8-1 karta na ang Ateneo at sapat na ito para dumiretso sa cham­pionship na inilagay sa best of three series.