MANILA, Philippines - Nakuha ng May Bukas Pa ang panalo sa pagbaba ng grupo na nangyari noong disperas ng Kapaskuhan sa San Lazaro Leisure Park sa Carmona Cavite.
Ang class D jockey na si RB Baylon ang gumabay sa kabayo na naunang nakontento na sinipat ang mga nasa unahan na Forest All at Golden Hue.
Pero nag-init ang sakay na si Baylon pagpasok sa huling kurbada at dito ay nagbalikatan ang Forest All pero buo na dumating ang May Bukas Pa tungo sa panalo.
Naliyamado pa ang May Bukas Pa at nagpamahagi ng P8.50 habang ku-mabig pa ng P19.50 ang dibidendo sa 2-6 forecast.
Nakaisa rin ang Basic Instinct habang nakapanilat ang Perfectionist na siyang lumabas bilang pinakadehadong kabayo na nanalo sa araw na ito.
Si JA Guce ang sumakay sa Basic Instinct sa ikalawang karera sa gabi at hindi nagpabaya ang tambalan sa hamon ng Color Me Good ni Dar De Ocampo at pinatawan ng 51 kilos handicap weight dahil sa pagiging apprentice rider ng hinete.
Naliyamado din ang Basic Instinct para makapagpasok din ng P8.00 sa win habang P20.00 ang nadehado pang 1-8 forecast.
Si Rodeo Fernandez ang gumabay sa Perfectionist na binigo ang sana’y panalo na asam ni De Ocampo sa Echikatsu.
Pinakadehadong kabayo na nakapanalasa ang Perfectionist at nagpasok ito ng P50.50 sa win habang mas magandang P660.50 ang dibidendo sa forecast na 3-1.