“NANGAKO ako sa’yo di ba? Hindi ko sasabihin kahit kanino na nagtapat ka sa akin,’’ sabi ni Hiyasmin. Pinanindigan niya na wala siyang pinagsasabihan kahit nasabi na niya iyon kay Nanay Julia.
“Magaling kasing mag-imbestiga ang nanay ko. Baka kulitin ka e madulas ang dila mo. Gusto ko talaga na walang makaaalam ng mga pinag-usapan natin.’’
“Makakaasa ka, Sir Dax.’’
“Huwag mo na kaya akong tawaging Sir. Dax na lang, puwede?’’
“Okey lang sa’yo?’’
“Oo naman. Kasi’y para akong tumatanda kapag tinatawag mong Sir Dax.’’
“E di sige, Dax.’’
“Pipilitin ko nang huwag maging tiyope sa iyo, Hiyasmin.’’
Sinenyasan ni Hiyasmin si Dax na huwag ilakas ang boses dahil baka marinig Grab driver.
Hininaan ni Dax ang pagsasalita. Napapansin nga rin niya na parang nakikinig ang drayber.
“Mabuti naman at napag-isip-isip mo na huwag nang maging mahiyain.’’
“Oo. Nilalabanan ko nang huwag maging dungo. Kung mawawala yun, baka maging madali ang pagtanggap mo sa akin.’’
Tumangu-tango si Hiyasmin.
“Baka hindi na magtagal at sagutin mo na ako.”
Muling sinenyasan ni Hiyasmin si Dax na huwag lakasan ang boses.
“Sorry,’’ sabi ni Dax.
“Meron lang akong pinuproblema, Dax.’’
“Ano yun?”
“Paano kung malaman ni Nanay Julia na hindi mo naman talaga ako boarder? Na ako ay pinag-aral mo?’’
“Anong problema roon? Wala akong nakikitang kasalanan dun.’’
“Ipagtapat ko na ba kay Nanay Julia ang tungkol dun?’’
“Huwag muna. Sasabihin ko sa’yo kung kailan.’’
“Sige.’’
LUNCH TIME. May sinabi si Dax kay Hiyasmin.
“Mamayang gabi, pupuntahan uli kita sa room mo.’’
“Bakit?”
“May sasabihin uli ako. May nakalimutan akong sabihin sa’yo.’’
“Ano yun?’’
“Mamaya ko na sasabihin.’’
“Ano oras ka pupunta?”
“Mga 11:00.’’
Itutuloy