Hiyasmin (166)
NAGTAKA si Hiyasmin kung sino ang kumakatok sa pinto. Mahina ang pagkatok sa pinto na parang nag-aalangan.
Baka si Nanay Julia?
Baka gustong makipagkuwentuhan?
Dama ni Hiyasmin na gustung-gustong makipagkuwentuhan sa kanya ang matanda—type na type siyang kausap.
Siguro ay hindi makatulog kaya pinuntahan siya.
Binuksan niya ang pinto.
Nagulat siya sapagkat hindi si Nanay Julia ang nakatayo sa may pinto kundi si Dax.
“Sorry Hiyasmin!”
“Bakit Sir Dax?’’
“Sa pagkatok ko.’’
“May kailangan ka Sir Dax?’’
“Magso-sorry lang.’’
“Saan?’’
“Sa mga sinabi ko kay Nanay na sinabi naman pala sa’yo. Akala ko hindi sasabihin.’’
“Okey lang naman yun, Sir Dax.’’
“At sa mga iba ko pang nasabi na nagdudulot sa iyo ng mga pagkalito. Nararamdaman ko kasi nitong mga nakaraang araw na nalilito ka sa mga sinasabi ko.’’
“Tulad ng ano?’’
Napakamot sa ulo si Dax.
“Puwede bang pumasok para diyan ko sa loob masabi. Marami akong sasabihin.’’
Nag-isip si Hiyasmin. Papapasukin ba niya?
Nag-aalala kasi siya na baka makita ni Nanay Julia kung papasukin niya si Dax. Baka kung ano ang isipin sa kanya lalo’t sa kalaliman ng gabi. Kahit na ba may inamin na siya sa matanda ukol sa nararamdaman kay Dax, hindi maganda na papasukin niya ito sa kuwarto.
“Kung puwede lang. Mahalaga kasing masabi ko.”
Nagpasya si Hiyasmin.
“Halika.’’
“Salamat.’’
Pumasok si Dax.
Itutuloy
- Latest
