Habang nasa loob ng classroom ay ang pangyayari kanina ang nasa isip ni Hiyasmin. Masyadong antipatiko si Rez na pati si Sir Dax ay napansin. Masyado raw matanda para maging boyfriend niya. Siguro ay nasaktan makaraang malaman na may siyota na siya kaya pinintasan si Sir Dax.
Tama lang talaga na sinabi niyang siyota niya si Sir Dax para hindi na siya kulitin. Pakiramdam ni Hiyasmin, malakas ang tama sa kanya ni Rez. Pero napaismid si Hiyasmin dahil hindi ang tipo ni Rez ang gusto niya —ayaw niya sa mayabang at pa-impress. Ayaw din niya sa pintasero.
Naisip din naman ni Hiyasmin, ano kaya at ikuwento niya kay Sir Dax ang nangyari. Wala naman sigurong masama kung ikuwento niya.
Mamaya, kapag sinundo siya ni Sir Dax ay ikukuwento niya. Titingnan niya kung ano ang reaksiyon kapag nalaman na ginawa niyang “boyfriend”.
Kinagabihan, pasado alas sais ay nagmamadaling lumabas si Hiyasmin. Maagang natapos ang activities nila.
Pagdating niya sa gate ng university ay naroon na si Sir Dax at naghihintay. Anong oras kaya dumating!
(Itutuloy)