“KAKAUSAPIN ko ang kapatid mong si France kung sasama siya sa akin sa pagdalaw sa iyong ina,’’ sabi ng tatay ni Brent. “Sabi nga pala ng kaibigan ng iyong ina na tumawag sa akin, kung dadalaw ako ay huwag nang pagtagalin sapagkat anumang oras ay maaaring malagutan ng hininga. Kaya nga bukas ng umaga, balak kong pumunta,’’ tumigil sandali ang tatay ni Brent at saka nagpatuloy.
“Nasa bahay ng kaibigan sa Sampaloc ang iyong ina. Inilabas na raw niya sa ospital makaraang sabihin ng doktor na nabibilang na ang araw. Wala na raw magagawa para dugtungan ang buhay.
“Ang kaibigan ang kumupkop dahil maski raw mga kapatid at kamag-anak ay walang may gusto. Sabi ng kaibigan, naging mabuti naman sa kanya ang iyong ina kaya hindi niya ito matiis. At least daw nakagawa siya ng mabuti sa kanyang kaibigan sa pamamagitan ng pagkupkop.’’
Nag-uusap pa sina Tatay at Brent nang dumating si France. Sinabi ng tatay ang pangyayari. Tinanong kung sasama ito sa pagdalaw sa ina. Sasama raw si France. Walang epekto kay Brent kung sasama man si France. Hindi kasi ito nakadama ng sakit sa ginawang kasalanan ng kanilang ina.
Itutuloy