Monay 161

Itinigil ni Joem ang pagbabasa sa sulat ni Cath at malalim na nag-isip. Binalikan ang mga sinabi ni Cath sa sulat na nagsasabing may espesyal na damdamin si Monay para sa kanya. Umiibig sa kanya si Monay. At naghihintay lamang daw ito para siya magtapat.

Kaya pala ganun na lamang kabait si Monay sa kanya. Kaya pala kahit pagalitan ng mama niya ay patuloy siyang binibigyan ng monay.

Napabuntunghininga si Joem. Sunud-sunod. Sa kanyang balintataw ay halinhinang nakalarawan sina Cath at Monay. Nakangiti sa kanya ang mga ito. Para bang maligayang-maligaya.

At naisip din naman ni Joem si Trishia. Naisip niya, siguro’y naipagtapat din ni Monay kay Trishia ang damdamin nito para sa kanya. At iyon ang dahilan kaya naiinis si Trishia. Nagseselos si Trishia. May lihim din na pag-ibig si Trishia kay Joem.

Humugot pa ng buntunghininga si Joem. At isa pa.

Naisip ni Joem si Monay. Mayroon pa kayang nadarama si Monay para sa kanya?  (Itutuloy)