Black Widow (106)
NATIGILAN si Marie nang matapos ang usapan nila ni Jam. Nag-OT pala si Jam at nag-OT din si Jose. Sa himig ng pananalita ni Jam ay masayang-masaya ito. Wala nang mababakas na problema sa kaibigan.
Pero nagmalisya na ang isipan ni Marie. Ayaw niyang pag-isipan nang masama ang kaibigan. Hindi nararapat sapagkat matalik niya itong kaibigan. Pero hindi niya maiwasang isipin na baka may gusto si Jam kay Jose. Sa kilos ni Jam parang inaakit niya si Jose.
Naalala ni Marie nang mag-outing sila sa Pinamalayan Beach. Halatang nilalandi ni Jam si Jose. Hindi lamang niya pinapansin sapagkat baka ganun lang talaga ang ugali ni Jam. Malambing at malapit ito sa mga lalaki. Baka naman nagkakamali lang siya sa hinala. At saka bakit ba siya problematic tungkol dun e di ba’t sabi niya kay Jose ay wala na siyang balak mag-asawa dahil namamatay nga ang lalaking nagkakaroon ng relasyon sa kanya.
Napabuntunghininga si Marie. Nagpasya siya na huwag nang sabihin kay Jam ang tungkol sa iniluluhog ni Jose. Sasarilinin na lamang niya. Baka magkaroon lamang ng problema sa kanilang dalawa.
Hindi na naman nakatulog ng gabing iyon si Marie. Naisip niya, mukhang ang pagpasok ni Jose sa kanyang buhay ay magdudulot nang hindi maganda. Mabuti nga yata ay huwag na siyang makipaglapit kay Jose para iwas gulo.
ISANG araw, nakatanggap ng tawag si Marie mula kay Jam. May ibinabalita ito.
“Ipagsasama ko si Jose sa Baguio. May seminar ako ng tatlong araw. Puwede kaya siya?’’
Hindi makasagot si Marie. Bakit kaya niya isasama si Jose?
(Itutuloy)
- Latest
