Tameme ang mga basher na nag-intriga kina Zsa Zsa Padilla at Miguel Tanfelix kung saan dinedma raw ng una ang aktor sa X (Twitter).
Matapos kasing mag-post ng nanay ni Karylle sa X noong Jan. 16 na natapos na raw niya ang teleseryeng Lavender Fields ay nagtanong ito kung ano raw kaya ang next niyang kahuhumalingan.
Nagkomento naman ang aktor kinabukasan at sinabing “hello ms zsa zsa! try nyo po silipin yung Mga Batang Riles hehe salamat po” na may heart emoji sa dulo pero walang sagot doon si Zsa Zsa.
Nag-post lamang ulit ito matapos ang mahigit isang linggo at sinabing sinimulan niya ang seryeng Incognito na pinagbibidahan nila Richard Gutierrez, na kalaban naman ng Mga Batang Riles ni Miguel.
Mukhang dinedma raw ito ni Zsa Zsa at mukhang hindi rin ito kilala ng singer.
Depensa naman ng ibang mga netizen ay baka naman daw hindi lang ito napansin ni Zsa Zsa sa rami nga ng mga nagkokomento sa post niya at malamang ay abala ito at hindi naman laging nakabantay sa kanyang social media account.
Pero mukhang nabasa niya ang mga komento ng mga marites na nagmalisya sa kanila na nilagyan ng issue ang ‘di niya pagsagot sa aktor dahil sumagot na ito.
Nagpasalamat siya kay Miguel sa pag-recommend nito at ito raw ang susunod niyang panonoorin.
Humingi pa ito ng tawad sa aktor at sinabing hindi raw nito agad nakita ang komento nito.
‘Kaloka naman kasi ngayon ginagawan ng intriga ang bawat komento.