Showbiz couple, may ibubunyag na major secret!

Isa sa mga araw na ito ay maaaring gugulatin tayo ng isang magandang balita mula sa isang kilalang showbiz couple.

Nasagap namin sa isang presscon kahapon na aksidenteng nabanggit ng isa sa mga nakatsikahan namin doon.

Pero secret pa raw ito talaga dahil siyempre, titiyakin pa nila kapag okay na okay na talaga.

At ibabalita nila kapag okay na okay na raw ang pagdadalangtao ng kilalang female celebrity.

Hindi ko puwedeng sabihin kung singer o actress o singer/actress dahil tiyak na mahuhulaan agad.

Ayokong sa aking manggaling, dahil mas maganda kung sila ang maglalabas ng magandang balitang ito.

Kaya abangan na lang natin.

Pero kapag sure na sure na, tiyak na ikatutuwa ito ng fans nila dahil ito na lang ang hinihintay.

Sana talaga totoo na ito!

Lolong at Quiapo, pukpukan sa rating

Masaya ang mga taga-GMA 7 sa magandang rating ng pilot episode ng Lolong: Bayani ng Bayan.

Nag-trending ito sa X nung Lunes gamit ang hashtag #LolongLakasAtPuso.

Sa pilot episode ng Lolong, nakapagtala ito ng 10.8 percent at ang Ang Batang Quiapo ay 15.9.

Sa araw ring ‘yun ay nagsimula na rin ang Incognito na naging katapat na ang Batang Riles na bumaba na ang timeslot.

Nakapagtala ng 8.9 percent ang Batang Riles at ang Incognito ay 8.7 percent.

Kapansin-pansin na pawang aksyon na ang napapanood sa primetime. Hindi na ang dating nasusubaybayan na mga drama na talagang magaganda.

Ang dami nating artistang drama ang forte, pero madalas ay sa afternoon prime na lang napapanood.

Ngayon, kahit ang drama ay nahahaluan pa rin ng action scenes.

Kahapon ay nagkaroon na ng story conference ang bagong action-drama nina Jennylyn Mercado at Dennis Trillo na Sanggang Dikit. Panibagong action na naman ito, na mas doon naka-focus kesa sa mag-drama.